ShQO-da mamandar tasqynnyń aldyn alý úshin tikushaqpen monıtorıng júrgizdi

ÓSKEMEN. QazAqparat - Shyǵys Qazaqstan oblysynda mamandar tikushaqpen sý tasqyny jaǵdaıyna baılanysty monıtorıng júrgizdi, dep habarlaıdy QazAqparat tilshisi.

ShQO TJD departamenti baspasóz qyzmetiniń málimetine súıensek, monıtorıng júrgizý maqsatynda óńir aýmaǵyndaǵy sý tasqyny qaýpi bar ýchaskelerge baqylaý júrgizildi. Sharaǵa Shyǵys Qazaqstan oblysy ákiminiń orynbasary Baqytjan Baıahmetov, ShQO TJD, «Qazseldenqorǵaý» ShQ fılıaly jáne «Qazgıdromet»RMK mamandary qatysqan. Aerovızýaldy baqylaý «Óskemen-Glýbokoe aýdany-Altaı aýdany-Katonqaraǵaı aýdany-Óskemen» baǵyty boıynsha júrgizildi.

«Monıtorıng barysynda Buqtyrma, Krasnoıarka, Glýbochanka ózenderiniń arnalary qaraldy. Aerovızýaldy zertteýler turaqty gıdrologııalyq jaǵdaıdy kórsetedi. Ózenderdegi sý deńgeıi qaýipti shekten tómen», - deıdi ShQO TJD tótenshe jaǵdaılardyń aldyn alý basqarmasynyń bastyǵy Alekseı Shtykel.

Oblys aýmaǵynda qar erıtin kezeń bastaldy. Óńirdiń qar basqan aýdany sońǵy 2 aptada 97% - dan 55%-ǵa deıin azaıdy. Jer tońynyń joǵary qabatynyń erýi baıqalady. Sonymen qatar jer tońynyń bir metrden astam qatýy oblystyń 6 aýdanynda: Kúrshim, Katonqaraǵaı, Besqaraǵaı, Zaısan, Altaı jáne Borodýlıha aýdandarynda saqtalǵan.

Aıta keteıik, oblystyń jazyq aýmaǵyndaǵy qar jamylǵysynyń bıiktigi 50 sm-den aspaıdy, tek Altaı aýdanynda 75 sm. Sý tasqyny bolǵan jaǵdaıda qalalar men aýdandardyń ákimdikteri 109,6 myń dana ydys-qap, 15,5 myń tonna ınertti materıal, 532 tonna JJM daıyndaǵan.