ShQO-da mamandar ózenderdegi keptelgen seńderdi jarýda
ÓSKEMEN. QazAqparat - Tótenshe jaǵdaılar mamandary óńirdegi ózenderde bógelip qalǵan seńderdi jara bastady. Shemonaıha aýdanyndaǵy Ýba ózeni qatań baqylaýǵa alynǵan, dep habarlaıdy «QazAqparat» HAA tilshisi departamenttiń baspasóz qyzmetine silteme jasap.
Qutqarýshylar buryn seńniń bógelýi baıqalǵan birneshe qaýipti ýchaskelerde profılaktıkalyq jarylys jasady. Ózendegi sýdyń deńgeıiniń kóterilýi men sý tasqynynyń qaýpin seıiltý úshin mamandar Verh-Ýba jáne Shemonaıha kentterinde jarylys jumystaryn júrgizdi. Qazir qutqarý qyzmetiniń barlyq garnızondarynyń mamandary sý tasqynynyń qaýpi bar aımaqtardaǵy turǵyndarmen jumys jasaýda.
Jeke turǵyn úılerdiń turǵyndaryna aýlany qardan tazartyp, aryqtar men jyralardy qoqystan tazartýǵa keńes berildi. Jańbyr jaýǵanda qar tez erip ketetin jáne sý tasqyny bolýy múmkin aýdandarǵa Glýbokovskıı, Shemonaıha, Zyrıanov, Qaton Qaraǵaı, Kúrshim aýdandary men Rıdder jáne Óskemen qalalary kiredi.
