ShQO-da malyn qaraýsyz jibergen 313 adam aıyppul tóledi
ÓSKEMEN. QazAqparat – Shyǵys Qazaqstan oblysynda polıtsııa qyzmetkerleri mal urlyǵyna qatysty 13 qylmysty ashty, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, mal urlyǵyna qatysty qylmystardy ashý jáne aldyn alý maqsatynda óńir boıynsha «Mal urlyǵy» jedel aldyn alý sharasy júrgizildi.
«Únemi aýyl turǵyndary men sharýa qojalyqtary ıelerine mal jaıý erejelerin saqtaý qajettiligi týraly túsindirý jumystaryn júrgizemiz. Óıtkeni úı janýarlaryn qaraýsyz qaldyrý, ádette urlyqqa alyp keledi», - dedi ShQO PD bastyǵynyń orynbasary Talǵat Shaıahmetov.
Shara barysynda mal urlyǵyna qatysty 13 qylmys ashylyp, 28 bas mal ıelerine qaıtaryldy. Qaraýsyz jaıylǵan 950-den astam úı janýary arnaıy turaqqa aıdaldy. QR ÁQBtK-niń 408-babyna sáıkes, maldardyń 313 ıesi ákimshilik jaýapkershilikke tartyldy.
Máselen, Ulan aýdanynyń polıtsııa bólimine 51 jastaǵy jergilikti turǵyn habarlasqan. Óz sózinde ol belgisiz bireýdiń erkin jaıylymnan iri qara malyn urlap ketkenin jetkizdi. Keltirilgen materıaldyq shyǵyn mólsheri – 250 000 teńgeden asqan. Jedel-izdestirý sharalary barysynda polıtseıler 34 jastaǵy er adamdy ustady. Kúdikti óz kinásin moıyndap otyr. Qazirgi ýaqytta atalǵan fakti boıynsha QR QK-niń 188-baby 1-bóligimen sotqa deıingi tergeý amaldary júrgizilýde.
Sonymen qatar 188 avtokólik tekserilip, tıisti qujattarsyz mal men et ónimderin tasymaldaý, satý boıynsha 20-dan astam ákimshilik quqyq buzýshylyq anyqtalǵan. 400-den astam sharýa qojalyqtary tekserildi.
Aıta keteıik, 2021 jyldyń alǵashqy úsh aıynda Shyǵys Qazaqstanda 413 bas mal urlanǵan. Polıtseıler 299 maldy ıelerine qaıtardy.
