ShQO-da maly joq adamdar sýbsıdııa alǵan – Oljas Bektenov

NUR-SULTAN. QazAqparat – Shyǵys Qazaqstan oblysynda prokýratýra ókilderi maly joq adamdarǵa sýbsıdııa berilgenin anyqtady. Bul týraly QR Sybaılas jemqorlyqqa qarsy is-qımyl agenttigi basshysynyń birinshi orynbasary Oljas Bektenov Aýyl sharýashylyǵy mınıstrliginde ótken keńeste aıtty, dep habarlaıdy QazAqparat tilshisi.

«Sýbsıdııa – saladaǵy eń jaýyr máseleniń biri. Jalǵan qujat boıynsha sýbsıdııa berý tyıylmaı tur. Mysaly, prokýratýra ókilderi Shyǵys Qazaqstan oblysynda maly joq sharýa qojalyqtarǵa sýbsıdııa berilgenin anyqtady. Ózgeniń malyn óziniki etip kórsetip, sýbsıdııa alyp kelgen. Jergilikti ákimdik pen «Atameken» ulttyq kásipkerler palatasyn, Aýyl sharýashylyǵy mınıstrligin osy máselege nazar aýdarýǵa shaqyramyn. Bul máseleni qalaı sheshemiz? Jyl saıyn qaıtalanyp otyr. Tyıylatyn túri joq», - dedi agenttik tóraǵasynyń orynbasary.

Oljas Bektenov sýbsıdııa memleket aqshasy ekenin aıta kelip, ony bólgen kezde kóz juma sheshim qabyldaýǵa bolmaıtynyn aıtty.

«Memleket aqshasyn bólgen kezde kóz jumyp qaradyńyzdar degen sóz. Erteń jaýapkershilik máselesi týyndaǵanda aqshany aýdarýǵa sońǵy bolyp kimniń qol qoıǵany da eskeriledi. Sondyqtan, máselege jiti qaraý kerek. Agenttiktiń oblystyq departament basshysyna atalǵan faktilerdi prokýratýra ókilderimen birge zerdeleýdi tapsyramyn. Ózge óńirlerge de osyndaı tapsyrma. Sýbsıdııa – eń jaýyr bolǵan máseleniń biri. Baqylaýǵa alý qajet», - dedi ol.