ShQO-da malshylar arasyndaǵy janjal adam ólimine soqtyrdy
SEMEI. QazAqparat - ShQO-da malshylar arasyndaǵy kıkiljiń sońy adam ólimine ákeldi. Bul týraly QazAqparat Shyǵys Qazaqstan oblystyq qylmystyq ister jónindegi mamandyrylǵan aýdanaralyq sotyna silteme jasap habarlaıdy.
Aǵymdaǵy jyldyń mamyr aıynyń 6-y kúni saǵat 07.00-de Aıagóz aýdany, Barshatas aýyldyq okrýgine qarasty «Keńes» sharýa qojalyǵynyń malshylary D.Abdollın men A.Kenbaev alkogoldik ishimdik ishken. Keıin ekeýi sózge kelispeı A.Kenbaev peshtiń qasynda turǵan temir kóseýmen dosynyń denesine eki ret soqqy jasaıdy. Osydan keıin D.Abdollın de A.Kenbaevqa degen jekkórinishtilik paıda bolyp, ony qasaqana óltirý týraly oıǵa keledi. Ol nan salatyn ydystyń qasynda turǵan pyshaqty alyp, sol jaq dene tusyna jeti ret suǵady. Azamat oqıǵa ornyna kóz jumǵan. Ólgenine kózi jetkennen keıin, óziniń jasaǵan qylmysyn jasyrý maqsatynda pyshaqty peshke salyp órtep jiberedi. Budan keıin mert bolǵan onyń qolyna basqa pyshaqty ustatyp, qaǵaz betine «Áke saǵan baramyn» dep jazyp, oqıǵa ornynan boı tasalaǵan.
Sot otyrysynda 37 jastaǵy qylmysker ózine taǵylǵan aıypty tolyq moıyndady. Ol QK-niń 99 babynyń 1-shi bóligindegi qylmysty jasaǵany úshin kináli dep tanylyp, 9 jylǵa bas bostandyǵynan aıyryldy. Sondaı-aq maskúnemdikten májbúrlep emdeý taǵaıyndaldy.
