ShQO-da mal urlaýmen aınalysyp kelgen eki uıymdasqan top músheleri ustaldy
ÓSKEMEN. QazAqparat - Shyǵys Qazaqstan oblysynyń polıtsııasy bıylǵy jyldyń qańtar aıynda mal urlaýmen aınalysyp kelgen eki uıymdasqan qylmystyq topty ustady. Olar aýyl turǵyndaryna 6 mıllıonnan astam teńge shyǵyn keltirgen, dep habarlaıdy QazAqparat tilshisi.
Semeı jáne Aıagóz aýdany turǵyndarynan qurylǵan bir qylmystyq top Jarma aýdanynda mal urlaǵan. Olar aýdan turǵyndarynan mal urlanǵan 9 epızodqa qatysy bar degen kúdikke ilindi. Byltyrǵy jyldyń qazan aıynan beri dalada jaıylyp júrgen nemese túngi ýaqytta aýyl qoralarynda turǵan maldy urlaǵan.
Tergeý nusqasy boıynsha, urlanǵan mal Semeı qalasyna jetkizilip, basqa adamdarǵa satylǵan. Jarma aýdanynyń turǵyndaryna keltirilgen shyǵyn 4,9 mıllıonnan astam teńgeni qurady.
Mal urylarynyń taǵy bir toby Ulan aýdanynda ustaldy. Qańtardyń basynda aýdandyq polıtsııa bólimine jergilikti úsh turǵynnan dalada jaıylyp júrgen jylqylarynyń urlanǵany týraly ótinish kelip tústi. Mal ıeleri keltirilgen shyǵyndy 1,3 mıllıon teńgege baǵalady. Búginde bul urlyqtardy jasaýda kúdikti tanylǵan úsh azamat anyqtaldy.
Polıtsııanyń habarlaýynsha, urlyqtyń barlyq oqıǵalary boıynsha QR Qylmystyq kodeksiniń 188-babymen sot aldyndaǵy tergeý amaldary júrgizilýde.
Avtor: Lıýdmıla Malko
