ShQO-da mal egýge shyqqan veterınarlar joǵalyp ketti
ÓSKEMEN. QazAqparat - Shyǵys Qazaqstannyń Kúrshim aýdanyna qarasty Maraldy aýyldyq okrýginde mal egýge shyqqan veterınarlar joǵalyp ketti, dep habarlaıdy QazAqparat tilshisi.
50 jastaǵy maman qasyndaǵy áriptesimen birge keshtetip Maraldy aýylynan Úshbulaq eldi mekenine shyǵady. Keıin olardyń dittegen jerge jetpegeni málim bolǵan. Maraldy aýylynan 5 shaqyrym jerdegi Kúrshim ózeniniń jaǵasynan veterınarlar mingen kóliktiń bólshekteri tabylǵan.
«Oqıǵanyń qalaı órbigenin tekserý organdary anyqtaýda. Ózen jaǵasynda kólikti kenet tejegen iz qalǵan. Ol iz ózen arnasyna jetip úzilgen. Jaǵalaýdyń bul bóligi opyrylýǵa beıim ekeni de kórinip tur. Avtomobıl Kúrshim ózenine batyp ketti degen boljam bar», - delingen oblystyq tótenshe jaǵdaılar departamenti taratqan aqparatta.
Joǵalǵan adamdardy izdeýge Shyǵys óńirlik aeroutqyr qutqarý jasaǵaynyń mamandary tartyldy.
«Qazir sý deńgeıi kóterilip ketken. Ózender tasyp jatqandyqtan eshteńe kórinbeıdi. Sý aǵysy da qarqyndy. Іzdeý jumystarynyń ózi táýekelmen júrgizilip jatyr. Qutqarýshylarǵa aýyl turǵyndarynan jasaqtalǵan 35 erikti qosyldy» - deıdi Kúrshim aýdandyq tótenshe jaǵdaılar bóliminiń basshysy Azamat Ábdirahmanov.
Ázirge qutqarýshylar bir mamannyń denesin sýdan alyp shyqty. Ol oqıǵa ornynan 30 shaqyrym jerdegi Qystaý Kúrshim aýylynyń mańynan tabyldy. Ekinshi adamnyń denesi áli izdestirilýde.
