ShQO-da mal egýge shyǵyp joǵalǵan veterınardyń denesi tabyldy
ÓSKEMEN. QazAqparat - Shyǵys Qazaqstannyń Kúrshim aýdanynda mal egýge shyǵyp, joǵalyp ketken veterınardyń denesi sýdan tabyldy, dep habarlaıdy QazAqparat tilshisi.
17 maýsym kúni 2 veterınar keshqurym Maraldy aýylynan Úshbulaq eldi mekenine mal egý úshin shyǵyp, habarsyz ketken bolatyn. Keıin Maraldy aýylynan 5 shaqyrym jerdegi Kúrshim ózeniniń jaǵasynan veterınarlar mingen kóliktiń bólshekteri tabylǵan. Oqıǵa ornynan 30 shaqyrym jerdegi Qystaý Kúrshim aýylynyń mańynda qutqarýshylar bir veterınardyń denesin ózennen alyp shyqqan bolatyn. Birneshe kúngi izdeý jumystarynan keıin 51 jastaǵy ekinshi veterınardyń da denesi sýdan tabyldy.
«Osydan úsh kún buryn sýdyń betinen veterınarlar mingen kóliktiń dóńgegelin baıqadyq. Kólikti sýdan shyǵarǵanymyzda ishinde adam joq bolyp shyqty. Mine, endi marqumnyń denesin Qoıtas aýylynyń tusynan taptyq. Bul mań men oqıǵa ornynyń arasy 58 shaqyrym» - deıdi Shyǵys óńirlik aeroutqyr qutqarý jasaǵyna qarasty 9-bólimsheniń basshysy Talǵat Nurjanov.
Marqumnyń denesi týystaryna berildi. Oqıǵanyń aıǵaqtyq zattaryn ishki ister qyzmetkerleri baqylaýyna aldy.
