ShQO-da Mádenıet úıi joq aýdan bar
ÓSKEMEN. QazAqparat - Shyǵys Qazaqstandaǵy Glýbokoe aýdanynyń ortalyǵy Mádenıet úıinsiz tur. Oblystyń ákimi Danıal Ahmetov ǵımarat qurylysyna qajet joba usynýdy tapsyrdy, dep habarlaıdy QazAqparat tilshisi.
Glýbokoe aýdanynda qos birdeı áleýmettik mańyzdy nysan boı kóteretin boldy. Onyń biri Mádenıet úıi bolsa, ekinshisi - dene shynyqtyrý-saýyqtyrý kesheni. Jergilikti ákimdik halyqqa sonyń qaısy kóbirek qajet ekenin anyqtap, jobalyq-smetalyq qujattaryn daıyndaýy tıis.
Aýdan ákiminiń halyq aldynda esep berý jıynyna qatysqan Danıal Ahmetov osyndaı tapsyrma berdi.
- Máslıhatpen birge otyryp, Mádenıet úıi men dene shynyqtyrý-saýyqtyrý ortalyǵynyń qaısyn birinshi salý kerektigin aqyldasyńyzdar. Mádenıet úıi joq aýdan - ol qandaı aýdan?! Jastar bas qosatyn, shyǵarmashylyqpen aınalysatyn, kitaphanasy bar oshaq aýdan ortalyǵyna kerek. Sondyqtan qajetti qujattardy keshiktirmeı ázirleńizder» - dedi ShQO ákimi Danıal Ahmetov.
