ShQO-da Lenın eskertkishin jóndeýge aqsha bólgen Altaı aýdanynyń ákimi óz erkimen qyzmetinen ketti

ÓSKEMEN. QazAqparat – Shyǵys Qazaqstan oblysy Altaı aýdanynyń ákimi Ernar Mustafın óz erkimen qyzmetin bosatty, dep habarlaıdy QazAqparat tilshisi.

Ernar Mustafın 2022 jyldyń qyrkúıek aıynda Altaı aýdanynyń ákimi bolyp taǵaıyndalǵan bolatyn. Osy laýazymda bir jylǵa jýyq qyzmet etken ol óz erkimen jumystan shyǵýǵa ótinish bergen.

Shyǵys Qazaqstan oblysy ákimi apparatynyń basshysy Erbol Nurǵalıevtyń aıtýynsha, aımaq basshysy Ermek Kósherbaev bul ótinishke qol qoıdy. Endi onyń ornyna Altaı aýdany ákiminiń mindetin Renat Qurmambaev atqarady.

Renat Tileýhanuly 1980 jyly 25 qańtarda Katonqaraǵaı aýdanynda dúnıege kelgen. «Injener-pedagog» jáne «zańger» mamandyqtary boıynsha eki joǵary bilimi bar.

Eńbek jolyn 1998 jyly Katonqaraǵaı aýdany Jańaýyl orta mektebinde muǵalim bolyp bastaǵan. Memlekettik qyzmetke alǵash ret 2003 jyly Katonqaraǵaı aýdanynyń jastarmen jumys jónindegi mádenıet bóliminiń bas mamany bolyp ornalasty.

2019-2021 jyldary Katonqaraǵaı aýdanynyń ákimi bolyp qyzmet etti. Osydan bir aı buryn Altaı aýdany ákimniń orynbasary bolyp taǵaıyndalǵan.

Eske salsaq, bıyl tamyz aıynda Shyǵys Qazaqstandaǵy Altaı qalasynda jóndelip jatqan Lenın eskertkishi qırap qalǵan bolatyn.

Keıin Altaı aýdanynyń ákimdigi ne sebepti Lenın eskertkishin jóndeýge qarajat bólgenin túsindirgen edi.

Taıaýda Lenın eskertkishiniń mańyna belgisiz bireý «Lenındi qaıtaryńdar!» dep jazyp ketken. Qazirgi ýaqytta ony polıtsııa izdestirip jatyr.