ShQO-da Qyzyl kitapqa engen torjýanyń 2 myń danasyn julǵan eki adam sottaldy

ÓSKEMEN. QazAqparat – Shyǵys Qazaqstan oblysynda Qyzyl kitapqa engen torjýanyń 2 myń danasyn julǵan eki adam sottaldy, dep habarlaıdy QazAqparat tilshisi.

Glýbokoe aýdandyq sotynda QR Qylmystyq Kodeksiniń 339-baby (sırek kezdesetin jáne quryp ketý qaýpi tóngen ósimdikter nemese janýarlar túrlerimen, olardyń bólikterimen nemese derıvattarymen zańsyz aınalysý) boıynsha qylmystyq is qaraldy.

«Eki aıyptalýshy Cheremshanka aýylynyń aýmaǵynda ósip turǵan Qazaqstannyń Qyzyl kitabyna engizilgen torjýany julyp, jınap alǵan. Olardan barlyǵy 1923 dana ósimdik tárkilendi. Osylaısha, sottalýshylar óz áreketterimen Cheremshanka orman sharýashylyǵyna qomaqty materıaldyq shyǵyn keltirgen», - dep habarlady sottyń baspasóz qyzmetinen.

Sot úkimimen Rıdder qalasynyń turǵyndary kináli dep tanylyp, bir jylǵa bas bostandyǵynan shekteldi. Úkim áli zańdy kúshine engen joq.