ShQO-da qyzmettik kóligin jeke maqsatta paıdalanǵan sheneýnik jumystan shyǵarylmaq
ASTANA. QazAqparat - ShQO-da Ádep jónindegi keńestiń kezekti otyrysynda Ertis basseındik ınspektsııasynyń basshysy Rysbek Súleımenovke qatysty tártiptik is qaraldy. Bul týraly altaynews.kz saıty habarlady.
Keńes músheleri Rysbek Súleımenovtiń óz qyzmettik kóligin jeke maqsattarǵa, naqty aıtqanda, otbasy múshelerin tasýǵa paıdalanǵandyǵy týraly máseleni qarady. Sondaı-aq ol tıisti qujattarǵa qol qoıyp, oǵan sáıkes, Ertis basseındik ınspektsııasynda júrgizýshi bolyp jumys isteıtin kúıeý balasy ózge áriptesterine qaraǵanda eki ese kóp syıaqy alǵan. Budan basqa, taǵy bir týysyn óz vedomstvosyna joǵary laýazymǵa taǵaıyndaǵan. Basshynyń bul áreketterin ınspektsııa qyzmetkerleri ózderi áshkere qylǵan.
«Rysbek Súleımenov ózine taǵylǵan aıyptardy moıyndamaı, kerisinshe ózin qorǵaýǵa baǵyttalǵan birqatar dálelderdi keltirip baqqanymen, onysy keńes músheleriniń sheshimin ózgertýge negiz bola almady. Ol óz sózinde qajetti dálelderdi jınaý qaǵıdatynyń buzylǵanyn aıtyp, qyzmettik kólikke beınebaqylaý ornatýdyń zańsyz ekendigin alǵa tartty. Al Naýryz merekesine oraı týǵan qaryndasynyń kúıeýiniń 50 myń teńge syıaqy alýyn, jalaqyǵa ústeme qosýdy ol emes, komıssııa músheleri qabyldaıtynyn aıtyp, aqtaldy. Alaıda, komıssııa músheleriniń bári onyń qolastyndaǵy qyzmetkerleri ekendigin jasyra almady», - dep jazady portal.
Ádep jónindegi keńes músheleri memlekettik qyzmetshiniń qyzmetindegi basty kemshilik - ujymdaǵy moraldyq-psıhologııalyq jaǵdaıdyń tym ýshyǵyp ketkendigin atady. Mekeme qyzmetkerleri jumyspen emes, kerisinshe birin-biri ańdýmen, ishki qaqtyǵystarmen aınalysyp ketken. Sondyqtan mekeme basshysy atqaryp otyrǵan qyzmetine múldem sáıkes emes degen qorytyndyǵa keldi. Osyǵan oraı Aýyl sharýashylyǵy mınıstrliginiń jaýapty hatshysy Ermek Kósherbaevtyń atyna sheneýnikti qyzmetinen bosatý týraly usynys joldandy.
Keńeste budan ózge, ústimizdegi jyldyń 7 tamyzynda ótken Ádep jónindegi keńes sheshimderiniń oryndalý jaıy da qaraldy. Máselen, Jarma aýdandyq Ádep komıssııasynyń tóraǵasy men komıssııa músheleri tártiptik jaza alsa, Óskemen qalalyq ákimdiginiń eki bólim basshysyna sógis berilip, qyzmetine tolyq sáıkes emestigi aıtyldy.
