ShQO-da qys kezinde mektepterde 71 ret sabaq ótkizilmegen
ÓSKEMEN. QazAqparat – Shyǵys Qazaqstan oblysynyń qutqarýshylary qysqy kezeńdi qorytyndylady, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, óńirde qysqy kezeńniń basynan beri kóshkin qaýpi bar ýchaskelerde 90 ret jarý jumystary júrgizilip, 594000 tekshe metr qar túsirilgen. Respýblıkalyq mańyzdaǵy tasjoldarda 4 medıtsınalyq-qutqarý pýnkti jumys istedi. Ondaǵy mamandar 17 ret kómekke shyǵyp, 46 adamǵa qol ushyn sozdy.
«Kólik joldaryn kútip ustaý úshin 857 qar tazalaıtyn tehnıka (avtogreıderler, shnekorotorlar, shynjyr tabandy jáne dóńgelekti traktorlar, tıegishter, avtosamosvaldar) jumyldyrylǵan. Jol qyzmetteri kóktaıǵaqqa qarsy materıaldardyń 14380 tonnadan astam qoryn jáne 980 ýaqytsha jol belgilerin daıyndady. Departament qyzmetkerleri qar qursaýynda qalǵan azamattarǵa udaıy kómek kórsetti. Naqty aıtqanda, tasjolǵa 179 avtokólik shyǵarylyp, 592 adam qutqaryldy jáne 54 adam evakýatsııalandy», - delingen habarlamada.
Óńir boıynsha aýa raıynyń qolaısyzdyǵyna baılanysty 71 ret sabaq toqtatylǵan. Muzdaǵy jazataıym oqıǵalardyń aldyn alý úshin TJD mamandary oblystyń barlyq aýdandarynda 1205 reıd júrgizip, sý aıdyndarynda júris-turys qaǵıdalary boıynsha 16 411 jadynama taratty.
Qabyldanǵan sharalar nátıjesinde respýblıkalyq jáne oblystyq mańyzy bar avtokólik joldarynyń boıynda qar kóshkini júrý qaýpi azaıdy. Búgingi kúni aımaq aýmaǵynyń bıik taýly jerlerinde kóshkin qaýpi áli de saqtalýda.
