ShQO-da qylmystyq top 19 myń doza esirtkini áleýmettik jeli arqyly satpaq bolǵan

ÓSKEMEN. QazAqparat – Shyǵys Qazaqstan oblysynda polıtseıler qylmystyq top múshelerinen sıntetıkalyq esirtkiniń 19 myń dozasyn tárkiledi, dep habarlaıdy QazAqparat tilshisi.

ShQO polıtsııa departamenti esirtki qylmysyna qarsy is-qımyl basqarmasynyń qyzmetkerleri «Jyldamdyq» dep atalatyn psıhotroptyq zattardy satýmen aınalysqandardy anyqtady.

«Polıtseıler Óskemen men Almaty qalalarynan sıntetıkalyq esirtkiniń iri partııasyn tapty. Belgili bolǵandaı, Óskemendegi 20-45 jas aralyǵyndaǵy 4 er adam esirtkini ınternet-resýrstar arqyly satyp kelgen. Satyp alýshylarmen tikeleı baılanysqa shyqpaı tek áleýmettik jeliler arqyly sóılesken olardy quqyq qorǵaý organdary uzaq ýaqyt boıy ustaı almady», - deıdi departament bastyǵy Saǵat Mádıev.

Qylmystyq toptyń taǵy eki múshesin QR ІІM esirtki qylmysyna qarsy is-qımyl departamentiniń jáne Almaty qalalyq polıtsııa departamentiniń qyzmetkerleri quryqtaǵan. Osy eki azamat psıhotroptyq zattardy tasymaldap, satýdy uıymdastyrǵan.

«Jedel-izdestirý sharalaryn júrgizý barysynda tártip saqshylary 6 kelige jýyq sıntetıkalyq esirtkini taýyp, onyń 19 myńnan astam dozasynyń satylýyna tosqaýyl qoıdy. Esirtkiniń qara naryqtaǵy quny 190 mıllıon teńgeni quraýy múmkin. Qazirgi ýaqytta kúdiktiler ýaqytsha ustaý ızolıatoryna qamaýǵa alynǵan. Sotqa deıingi tergeý amaldary júrgizilýde», - deıdi Saǵat Mádıev.