ShQO-da qylmys azaıyp keledi - general-maıor Janarbek Baqtybaev
NUR-SULTAN. QazAqparat – Shyǵys Qazaqstan oblysynda qylmys edáýir azaıyp keledi.
Bul týraly Altaı jáne Qatonqaraǵaı aýdandarynyń turǵyndarymen kezdesýde oblystyń polıtsııa departamentiniń bastyǵy general-maıor Janarbek Baqtybaev málim etti, dep habarlaıdy QazAqparat.
Janarbek Baqtybaevtyń aıtýynsha, óńir qylmystar sany boıynsha Almaty, Nur-Sultan qalalary jáne Almaty oblysynan keıingi tórtinshi orynda turady.
«Sońǵy úsh jylda oblysta qylmys azaıyp keledi. Bıylǵy 8 aıda 13 myń qylmys tirkeldi, bul 2018 jyldyń osy kezeńimen salystyrǵanda 21% az», - dedi J. Baqtybaev.
Onyń aıtýynsha, 2018 jyly qylmystardyń ashylý deńgeıi 58%, al aýyr jáne erekshe aýyr qylmystardyń 83% ashylǵan. Bul jaǵynan alǵanda da bıylǵy kórsetkishter byltyrǵydan táýirirek.
«Jalpy, Shyǵys Qazaqstan oblysynda qylmystardyń barlyq túri qysqaryp keledi. Atap aıtqanda, adam óltirý 12%, zorlaý 10%, tonaý 15%, buzaqylyq 54%, bótenniń múlkin urlaý 24%, páter tonaý 65%, mal urlaý 25% azaıdy», - dedi departament basshysy.
Budan tys, qoǵamdyq oryndar men kóshelerdegi qylmys 25 paıyzǵa, retsıdıv jáne kámeletke tolmaǵandar arasyndaǵy qylmys 12 paıyzǵa, mas kúıdegi qylmystar 9 paıyzǵa azaıǵan.
