ShQO-da kvadrotsıklmen soqtyǵysqan 15 jastaǵy mototsıklshi kóz jumdy
ÓSKEMEN. QazAqparat – Shyǵys Qazaqstan oblysy Glýbokoe aýdanynda mas júrgizýshi tizgindegen kvadrotsıklmen soqtyǵysqan 15 jastaǵy mototsıklshi kóz jumdy, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, 20 qyrkúıek kúni saǵat 18:00 shamasynda Glýbokoe aýdanynda júrgizýshi kýáliginen aıyrylsa da mas kúıde kvadrotsıkl tizgindegen 55 jastaǵy er adam ekinshi dárejeli joldan bas jolǵa shyǵa bere mototsıklmen soqtyǵysqan.
«Ortalyq aýdandyq aýrýhananyń jansaqtaý bólimine jetkizilgen kámelettik jasqa tolmaǵan mototsıkl júrgizýshisi 26 qyrkúıekte esin jımastan jantásilim etti. Atalǵan fakti boıynsha Qazaqstan Respýblıkasy Qylmystyq kodeksiniń 346-baby 5-bóligimen sotqa deıingi tergeý amaldary júrgizilýde», - dedi ShQO PD bastyǵy Saǵat Mádıev.
Qazirde kúdikti ýaqytsha ustaý ızolıatoryna qamaýǵa alynǵan. Birqatar sot-medıtsınalyq saraptamalar taǵaıyndaldy. Kvadrotsıkl júrgizýshisi 9 jylǵa deıingi merzimge bas bostandyǵynan aıyrylýy múmkin.
