ShQO-da qutqarýshylardyń qysqa daıyndyǵy tekserildi
ShQO Tótenshe jaǵdaılar departamenti baspasóz qyzmetiniń málimetine súıensek, oblys ákiminiń orynbasary Nurjan Jumádilovtiń basshylyǵymen TJ aldyn alý jáne joıý jónindegi komıssııanyń kezekti otyrysy ótti. Jıyn barysynda sý tasqynyna qarsy is-sharalar, qys kezindegi jurtshylyqtyń qaýipsizdigin qamtamasyz etý máseleleri talqyǵa salyndy.
«Bıyl eldi mekenderdi sý basýdan qorǵaý maqsatyndaǵy jol kartasy sheńberinde jalpy somasy 162 mln teńgege oblystyń 6 aýdanynda (Altaı, Tarbaǵataı, Glýbokoe, Besqaraǵaı, Zaısan jáne Katonqaraǵaı) josparlanǵan 11 shara tolyqtaı iske asyryldy. Qorǵanys bógetterin aǵymdaǵy jóndeý, ózen arnalaryn tazartý, jaǵalaýdy nyǵaıtý syndy jumystar júrgizildi», - dedi TJD tótenshe jaǵdaılardyń aldyn alý basqarmasynyń bastyǵy Alekseı Shtykel.
Shyǵys Qazaqstan aýmaǵynda muz ústinde balyq aýlaıtyndar az emes. Balyq aýlaý kezinde qaýipsizdik sharalaryn saqtamaý saldarynan 4 adam kóz jumǵan. Osy rette, qutqarýshylar balyqshylarǵa túsindirý jumystaryn júrgizip jatyr.
«Otyrystaǵy ózekti taqyryp – bıylǵy qysqy kezeń boldy. Osy kúnge deıin aýa raıynyń qolaısyzdyǵyna baılanysty oblys aýmaǵynda 7 ret daýyldy eskertý jarııalanyp, aımaq joldary 9 ret jabylǵan. Nurjan Jumadilov qalalar men aýdandardyń ákimdikterine, ShQO Jolaýshylar kóligi jáne avtomobıl joldary basqarmasyna, jol qyzmetterine qysqy jaǵdaıda jylytý pýnktteriniń daıyndyǵyn jáne jumysyn qamtamasyz etý, qar qursaýynda qalǵan júrgizýshiler men jolaýshylar úshin qosymsha jylytý jáne tamaqtandyrý pýnktteri retinde jol boıyndaǵy dámhanalardy paıdalanýdy qarastyrýdy tapsyrdy», - delingen aqparatta.
