ShQO-da qutqarýshylar jolda qalǵan 3 balyqshyǵa kómektesti
ÓSKEMEN. QazAqparat – Shyǵys Qazaqstan oblysynda qutqarýshylar kóligi buzylyp jolda qalǵan úsh balyqshyǵa kómek kórsetti, dep habarlaıdy QazAqparat.
ShQO Tótenshe jaǵdaılar departamenti baspasóz qyzmetiniń málimetine súıensek, Ulan aýdanyndaǵy Kamensk sý qoımasynyń mańynda balyqshylardyń «VAZ 2104» markaly avtokóligi synyp qalǵan.
«Olar birden qutqarýshylardy kómekke shaqyrdy. Oqıǵa ornyna kelip jetken Ulan aýdandyq Tótenshe jaǵdaılar bóliminiń qyzmetkerleri balyqshylardy evakýatsııalap, jaqyn mańdaǵy Jańa Qanaı eldi mekenine jetkizdi. Sodan keıin olardy týystary basqa kólikpen Óskemen qalasyna alyp ketken», - dep habarlady vedomstvo ókilderi.
Osy rette, TJD óńir halqyna qaýipsizdik sharalaryn esten shyǵarmaý qajettigin, alys saparǵa shyqqan kezde «Dármen» mobıldi qosymshasy arqyly joldardyń jaı-kúıi týraly bilip otyrýǵa bolatyndyǵyn eske saldy.
