ShQO-da qutqarýshylar taýda aıaǵyn syndyryp alǵan adamǵa tikushaqpen kómekke keldi
ÓSKEMEN. QazAqparat - Shyǵys Qazaqstan oblysynyń qutqarýshylary taýda aıaǵyn syndyryp alǵan adamǵa tikushaqpen kómekke keldi, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, 1962 jylǵy er adam 16 sáýirde shańǵymen Maloýbınsk sý qoımasyna qaraı bet aldy. Rıdder qalasynan 70 shaqyrym qashyqtyqtaǵy taýly jerde ol aıaǵyn syndyryp alǵan.
«Zardap shegýshige shuǵyl kómek kórsetý úshin MI-8 tikushaǵy jumyldyryldy. Onda TJD qutqarýshylary men Apattar medıtsınasy ortalyǵynyń qyzmetkerleri bolǵan. Olar Óskemennen ushyp shyǵyp, oqıǵa ornyna kelip jetti. Er adamǵa alǵashqy medıtsınalyq kómek kórsetildi. Sodan keıin ol tikushaqpen Rıdder qalasynyń aýrýhanasyna jetkizildi», - dep habarlady vedomstvo ókilderi.
Osy rette, departament mamandary óńir jurtshylyǵyna taýly jerlerge shyǵý qaýipti ekendigin, al barǵan jaǵdaıda ózińizben birge alǵashqy medıtsınalyq kómek kórsetý qobdıshasyn alyp júrý qajettigin eskertedi.
