ShQO-da qutqarýshylar órt ishinen 7 gaz ballonyn shyǵaryp úlgerdi

ÓSKEMEN. QazAqparat – Shyǵys Qazaqstan oblysynyń qutqarýshylary eki jerde shyqqan órtti sóndirý barysynda 7 gaz ballonyn syrtqa alyp shyǵyp úlgerdi, dep habarlaıdy QazAqparat tilshisi.

ShQO tótenshe jaǵdaılar departamenti baspasóz qyzmetiniń málimetine súıensek, 11 qarasha kúni saǵat 17:03-te Altaı qalasynda jeke turǵyn úıdiń aýlasynda órt shyqqan. Sharýashylyq qora-jaıdyń aǵash qurylymdaryna jaıylǵan qyzyl jalynnyń jalpy aýdany – 24 sharshy metr. №2 mamandandyrylǵan órt sóndirý bóliminiń qyzmetkerleri ǵımarat ishinen 3 ottegi ballonyn jáne 5 gaz ballonyn alyp shyqty.

«Órt garajda turǵan 1996 jylǵy «Sýbarý Legası» markaly avtokóligine jáne jeke turǵyn úıdiń kireberisine tarap ketti. Tilsiz jaýdyń shyǵý sebebi – otty abaısyz qoldaný bolýy múmkin. Órtti sóndirýge barlyǵy 3 tehnıka men jeke quramnan 9 adam jumyldyryldy», - delingen aqparatta.

Sol kúni Óskemendegi saıajaı qaýymdastyǵynyń aýmaǵynda 2 qabatty saıajaıda órt boldy. Shatyrdyń aǵash qurylymdary, jıhaz, esik pen tereze bloktary jáne qabyrǵalar otqa orandy. Órt sóndirýshiler as úıden 27 lıtrlik eki gaz ballonyn syrtqa shyǵardy.

Kóp uzamaı jalyn tolyqtaı aýyzdyqtaldy. Aldyn ala málimet boıynsha órttiń shyǵý sebebi – pesh ornatý jáne paıdalaný kezinde qaýipsizdik erejelerin saqtamaý.

Aıta keteıik, jyl basynan beri óńirdiń turǵyn úı sektorynda 464 ret órt shyqqan.