ShQO-da qutqarýshylar men polıtseıler jaǵajaılarda 1391 reıd júrgizdi
ShQO TJD baspasóz qyzmetiniń málimetine súıensek, shomylýǵa tyıym salynǵan ýchaskelerdi qutqarýshylar jaz boıy patrýldeıdi. Jaz bastalǵaly beri polıtsııa jáne eriktilerdiń qatysýymen 1391 profılaktıkalyq reıd júrgizilgen.
Sonyń nátıjesinde ÁQBtK-niń 440-baby (Alkogoldik ishimdikterdi ishý nemese qoǵamdyq oryndarǵa masań kúıde kelý) boıynsha 93 adam jáne 364-babyna (Ortaq sý paıdalaný qaǵıdalaryn buzý) sáıkes 60 azamat ákimshilik jaýapkershilikke tartyldy.
«Qutqarýshylar qaýipsizdik sharalaryn elemeıtin demalýshylarǵa túsindirý jumystaryn júrgizý úshin erekshe aktsııa ótkizdi. Ol úshin sýǵa shomylýǵa tyıym salynǵan jaǵajaılardyń biri tańdaldy. Bul - túbi tereń jáne súńgýirler teksermegen sý aıdyny. Munda birneshe qaıǵyly oqıǵa bolǵan», - delingen habarlamada.
Aktsııa barysynda ertegi keıipkeri «Sý perisi» kimde-kim spırttik ishimdik ishse, tyıym salynǵan jaǵajaıǵa shomylýǵa kelse jáne alysqa júzip ketse, sony torǵa orap, jaǵajaıǵa súırep shyǵardy.
«Osyndaı shara nátıjesinde kóptegen azamattar bizdiń eskertýlerimizge qulaq túre bastaıdy. Demalýshylarǵa nusqaýlyqtar ótkizilip, sý aıdyndaryndaǵy adam óliminiń sebepteri jáne zańdy saqtamaýdyń jaýapkershiligi túsindirildi», - delingen aqparatta.