ShQO-da qutqarýshylar kúnine 10 ret terek mamyǵynan shyqqan órtti sóndiredi
ÓSKEMEN. QazAqparat – Shyǵys Qazaqstan oblysynyń qutqarýshylary kúnine 10 ret terek mamyǵynan shyqqan órtti sóndiredi, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, maýsym aıynda óńir boıynsha mamyqtyń órtenýi kóbeıedi.
«Órt sóndirýshiler kúnine 10 ret terektiń mamyǵynan shyqqan qyzyl jalyndy aýyzdyqtaıdy. Kóbinese tilsiz jaýdyń shyǵýyna – turǵyndardyń otpen abaısyz áreket etýi jáne balalardyń mamyqty órteýi sebep bolǵan. Mamyq qas qaǵymda, jyldam janyp, jan-jaqqa ot shashady. Sondaı-aq órt garajdarǵa, qora-jaılarǵa jáne turǵyn úılerge qaýip tóndiredi», - dep habarlady vedomstvo ókilderi.
Osy rette, departament mamandary óńir jurtshylyǵyna órt qaýipsizdigi talaptaryn qatań saqtaýǵa shaqyrady. Jalyn shyqqan jaǵdaıda dereý «101» nemese «112» nómirine qońyraý shalý qajet.
