ShQO-da qutqarýshylar kólikke qystyrylyp qalǵan adamdy alyp shyqty
ÓSKEMEN. QazAqparat – Shyǵys Qazaqstan oblysynda qutqarýshylar jol apatynan kólikke qystyrylyp qalǵan adamdy alyp shyqty, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, jol-kólik oqıǵasy 19 qazan kúni saǵat 05.43-te Altaı aýdany Kýrchatov kóshesinde bolǵan. «VAZ 21010» markaly avtokólikti tizgindegen er adam rýlge ıe bola almaı qalyp, aǵashqa soǵyldy.
«Jol apaty saldarynan júrgizýshi kólikke qystyrylyp qalǵan. Qutqarýshylar oqıǵa ornyna shuǵyl kelip jetti. Gıdravlıkalyq quraldyń kómegimen kóliktiń artqy esigin ashyp, 1981 jylǵy azamatty alyp shyqty», - dep habarlady vedomstvo ókilderi.
Densaýlyǵy ortasha aýyr jaǵdaıdaǵy zardap shegýshi jedel járdem qyzmetkerlerine tapsyryldy.
