ShQO-da qutqarýshylar qatarynda 79 kópbalaly ata-ana bar

ÓSKEMEN. QazAqparat – Shyǵys Qazaqstan oblysynda qutqarýshylar qatarynda 79 kópbalaly ata-ana bar. Qandaı da bir qıyndyqqa tap bolǵan jandarǵa únemi kómekke attanatyn olar úıde qamqor áke, qamkóńil ana, dep habarlaıdy QazAqparat tilshisi.

Memleket basshysy Qasym-Jomart Toqaev 2022 jyldy Balalar jyly dep jarııalady. ShQO Tótenshe jaǵdaılar departamentinde eńbek etetin qutqarýshylar men órt sóndirýshiler arasynda 79 kópbalaly ata-ana bar. Olar kúndiz-túni azamattardyń qaýipsizdigin qamtamasyz etýde.

Eń úlken otbasy Óskemen qalasynyń №4 órt sóndirý bólimshesiniń komandıri Aıdar Býlekpaevtyń januıasy. Ol 6 ul tárbıelep otyr. Eń kishi balasy Maǵjan 2 aıdan keıin bir jasqa tolady. Jubaıy Aıaýlym qazir dekrettik demalysta. Mamandaǵy – medıtsına qyzmetkeri. Úıdiń barlyq sharýasyn atqaryp, 6 batyrdyń tárbıesimen aınalysady. Arqa súıer azamaty Aıdar qashan da qasynan tabylady. Otaǵasy azamattyq qorǵaý júıesinde 2005 jyldan bastap qyzmet atqarýda. Osy ýaqytqa deıin 100-den astam órtti sóndirýge qatysqan.

«Keıbireýler bos ýaqytyn balyq aýlaý nemese ańǵa shyǵýmen ótkizse, men qolym qalt etse ár mınýtty otbasym men balalaryma arnaımyn. Áke retindegi basty mindetim – uldarymdy jaqsy azamat etip tárbıeleý. Keń dastarhanda jınalyp, qonaq kútkendi unatamyz. Qudaıǵa shúkir, uldarym aman-esen ósip keledi. Áke jolyn qýyp, qutqarýshy bolǵylary keledi», - dedi Aıdar Býlekpaev.

Semeı qalasynyń Tótenshe jaǵdaılar basqarmasy azamattyq qorǵanys bóliminiń bastyǵy Qymbat Kópbaev 5 bala tárbıelep otyr. Onyń 4 uly jáne 1 qyzy bar. Úlken uly Janmuhammed – 11-de, kishi qyzy Marııam – 3 jasta.

«Kelinshegim Indıramen 2009 jyly shańyraq kóterdik. Ol da TJ salasynda qyzmet atqaryp, maıor shenimen zeınetke shyqty. Baqytty ata-anamyz. Úlken balalar kishilerdi qaraýǵa kómektesip, qolǵabys bolýda. Demalys kúnderin otbasymmen birge ótkizemin. Sebebi bul eń qymbat, baǵaly sátter», - dedi Qymbat Kópbaev.