ShQO-da qutqarýshylar boranda qalǵan aýyl turǵyndaryna kómektesti
ÓSKEMEN. QazAqparat - Shyǵys Qazaqstan oblysy Ulan aýdanynda qutqarýshylar qatty soqqan borannan úılerine qaıta almaı qalǵan turǵyndarǵa kómektesti, dep habarlaıdy QazAqparat.
Sońǵy kúnderi Shyǵys Qazaqstanda qardyń tolassyz jaýyp burqasyndatqany sonsha joldar birinen soń biri jabylýda. Ulan aýdanyna qarasty aýyldardyń birinde ornalasqan sharýa qojalyǵynda eńbek etetin jumysshylar azyq-túlik alý úshin aýdan ortalyǵy Qasym Qaısenov kentine attanǵan. Alaıda boran kúsheıip, olar keri qaıta almaǵan. Osynyń saldarynan qojalyqtaǵy mal esh qaraýsyz qalypty. Muny estigen aýdan ákiminiń orynbasary oblystyq Tótenshe jaǵdaılar basqarmasyna habarlasyp kómek suraǵan.
«Qar aralas boranǵa qaramastan qutqarýshylar «TREKOL» markaly jol talǵamaıtyn kólikpen sharýa qojalyq jumysshylaryn aýylǵa jetkizip tastady. Zardap shekken eshkim joq», dep habarlady ShQO Tótenshe jaǵdaılar departamentiniń baspasóz qyzmeti.
