ShQO-da qutqarýshylar jaǵajaılardy áýeden patrýldep júr

ÓSKEMEN. KAZINFORM – Shyǵys Qazaqstan oblysynda sý aıdyndaryndaǵy qaýipsizdik sharalary kúsheıtildi.

ShQO Tótenshe jaǵdaılar departamenti baspasóz qyzmetiniń málimetine súıensek, jaǵajaılardaǵy qaýipsizdik drondardyń kómegimen baqylaýǵa alynǵan.

- Kún saıyn óńirde qutqarýshylar, dárigerler, eriktiler men áskerı qyzmetshiler reıdke shyǵady. Sol kezde drondardyń kómegimen sý jaǵalaýyndaǵy jaǵdaıdy naqty ýaqyt rejıminde baqylaýǵa múmkindik bar. Kim alysqa júzip ketti, kim tyıym salynǵan jerde shomylyp júr, qaı jerde balalar qaraýsyz qalǵan – bári kórinip turady, - delingen aqparatta.

Sonymen qatar TJD qyzmetkerleri jaǵajaılarda demalýshylarǵa sýdaǵy qaýipsizdik erejelerin, oqys oqıǵalarda kómek kórsetý tásilderin jáne tyıym salynǵan belgilerdi elemeýdiń saldary qandaı bolatynyn túsindirip júr. Ásirese resmı jabdyqtalmaǵan jaǵajaılarǵa nazar aýdarylǵan.

- Oblys aýmaǵynda shomylýǵa ruqsat etilgen 25 oryn bar. Alaıda olardyń tek segizi ǵana tolyq jabdyqtalǵan. 74 ýchaskede shomylýǵa tyıym salynǵan, al 29-ynda shaǵyn kólemdi kemelerdiń qozǵalysyna shekteý qoıylǵan, - deıdi departamenttiń azamattyq qorǵanys basqarmasynyń bastyǵy Daýren Aǵajaev.

Eske salsaq, osyǵan deıin Óskemende sýǵa aǵyp ketken jigittiń denesi tabylǵany habarlanǵan.