ShQO-da qutqarýshylar pesh jaǵyp otyrǵan 59 myńnan astam úıdi tekserdi

ÓSKEMEN. KAZINFORM – Shyǵys Qazaqstan oblysynyń qutqarýshylary órt qaýipsizdigin qamtamasyz etý maqsatynda pesh jaǵyp otyrǵan 59 myńnan astam úıdi tekserdi.

ShQO TJD baspasóz qyzmetiniń málimetine súıensek, jylytý maýsymy bastalǵaly beri pesh jaǵyp otyrǵan úılerge baqylaý kúsheıtilgen.

Ýaqytyly júrgizilgen profılaktıkalyq jumystardyń nátıjesinde 17 myńǵa jýyq zańbuzýshylyq anyqtalyp, onyń 2489-y TJD qyzmetkerleriniń usynymy boıynsha sol jerde joıyldy.

- Reıdter barysynda áleýmettik turǵyda osal sanattaǵy azamattardyń qaýipsizdigin qamtamasyz etý maqsatynda úılerge TJD qyzmetkerleri ýly gazdy anyqtaıtyn 489 datchık ornatty. Osy jylytý maýsymynda mundaı datchık turǵyn úıge taraǵan qaýipti gaz týraly der kezinde dabyl berip, egde jastaǵy áıeldiń ómirin saqtap qaldy, - deıdi departamenttiń memlekettik órt baqylaý basqarmasynyń bastyǵy Nurjan Ómirjanov.

Kóbinese turǵyn úılerdegi zańbuzýshylyqtar peshter men elektr quraldaryn durys paıdalanbaýǵa qatysty bolyp otyr. Atap aıtqanda, tútin murjalary ýaqytyly tazalanbaıdy, jaryǵy bar peshter jóndelmeıdi, órt qaýpi joǵary toqtar qoldanylady jáne bir toqqa birneshe elektr quraly qosylyp, jelige artyq júkteme túsiriledi.

Eske salsaq, osyǵan deıin BQO-da órt bolǵan jerden eki adamnyń denesi tabylǵany habarlanǵan.