ShQO-da qutqarýshylar órttiń aldyn alý úshin 42 myń úıdi tekserip shyqty

ÓSKEMEN. KAZINFORM - Shyǵys Qazaqstan oblysynda jer úılerde órttiń aldyn alýǵa baǵyttalǵan reıdter jalǵasyp jatyr.

ShQO Tótenshe jaǵdaılar departamenti baspasóz qyzmetiniń málimetine súıensek, tekserýlerdiń basty maqsaty - jeke turǵyn úı sektorlarynda órt sanyn azaıtý jáne adam óliminiń aldyn alý.

- Shyǵys Qazaqstanda aýqymdy órt qaýipsizdigi aılyǵy ótkizildi. Sonyń barysynda jergilikti atqarýshy organdar, eriktiler men túrli qaýymdastyq músheleriniń qatysýymen birqatar jumystar atqaryldy. Atap aıtqanda, turǵyn úılerdi aralaý, reıdter, nusqaýlyqtar ótkizý jáne áleýmettik turǵyda osal januıalarǵa kómek kórsetý sııaqty is-sharalar júrgizildi.

Barlyǵy 42 000 úı qamtyldy. Ulan jáne Glýbokoe aýdandarynda kópbalaly jáne az qamtylǵan otbasylardyń peshterine jóndeý jumystary júrgizildi.

Oblys boıynsha úılerge jalpy sany 500-ge jýyq ýly gazdy anyqtaıtyn datchıkter ornatyldy, - delingen aqparatta.

Qutqarýshylar peshtegi sańylaýlar, tazalanbaǵan murja jáne elektr júıeleriniń shamadan tys júktemeli - órtterdiń negizgi sebepteri ekendigin túsindirdi. Azamattarǵa tozǵan elektr quraldaryn paıdalanbaý qajettigi eskertildi.

Eske salsaq, osyǵan deıin ShQO-da orman órtiniń basym bóligi Katonqaraǵaı ulttyq parkinde tirkelgeni habarlanǵan.