ShQO-da qutqarý operatsııalaryna arnaıy jattyqqan ıtter tartylýda
ÓSKEMEN. QazAqparat – Shyǵys Qazaqstan oblysynyń qutqarýshylaryna jattyqqan ıtter joǵalǵan adamdardy tabýǵa kómektesýde, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, búginde qutqarýshylarmen birge Barbarellı Kastelfranko, Mıllenıým Star, Hıt, Vılson jáne Alesıa laqapatty 5 ıt jumys isteıdi.
«Olar kúshik kezinen qutqarý operatsııalaryna daıyndala bastaıdy. Bul uzaq ýaqytty jáne tabandylyqty qajet etetin protsess. Itter ártúrli tótenshe jaǵdaılarda zardap shekkenderdi izdeıdi. Olar orman men taýlarda joǵalǵan adamdardy jyldam tabýǵa sep bolýda. Shyǵys Qazaqstan kóshkin jáne sel qaýpi joaǵy óńirlerdiń biri ekendigi belgili. Eger taýda qandaı da bir tótenshe jaǵdaı bolsa, onda tórt aıaqty kómekshilerdi paıdalanamyz», - deıdi qutqarýshylar.
Departamenttiń kınolog-mamandary qyzmettik ıtterdi daıyndaýda tájirıbesi zor. Daıyndyq maqsatynda praktıkalyq sabaqtar da ótkiziledi.
Negizinen ıtterdiń arasynda Labrador tuqymynyń orny erek. Ol óziniń ınstınktimen, adamǵa degen súıispenshiligimen, batyldyǵymen, aqylymen erekshelenedi. Sondaı-aq saǵatyna 5 shaqyrym jyldamdyqpen júze alady.
«Óńirdegi kınologııalyq qyzmet respýblıka boıynsha alǵashqylardyń biri bolyp quryldy. Qazir mundaı ıtter QR Tótenshe jaǵdaılar mınıstrliginiń árbir qutqarý bólimshesinde bar. Sondyqtan jyl saıyn ıtter arasynda jarystar uıymdastyrylyp turady. 2019 jyly Hıt laqapatty ıt respýblıkalyq dodada 2 oryn alǵan», - delingen vedomstvo málimetinde.
Osy jyldyń basynan beri oblystyq TJD-nyń ıtteri 4 izdestirý-qutqarý operatsııasyna qatysty.
