ShQO-da qusbegilikten chempıonat ótip jatyr
ÓSKEMEN. KAZINFORM — Shyǵys Qazaqstan oblysynyń Kúrshim aýdanynda qusbegilikten oblystyq II chempıonat ótip jatyr. Bul týraly Shyǵys Qazaqstan oblysynyń dene shynyqtyrý jáne sport basqarmasy habarlady.
6-8 aqpan kúnderi uıymdastyrylǵan baıraqty básekege óńirdiń eń myqty shamamen 30 qusbegisi qatysyp jatyr.
Atalǵan jarys qazaq halqynyń kóne dástúrlerin jańǵyrtýǵa jáne ulttyq sport túrlerin keńinen nasıhattaýǵa baǵyttalǵan.
Chempıonat eki sanat boıynsha ótýde: búrkitter men qarshyǵalar arasynda. Saıys barysynda ańshy men qyran qustyń ózara úılesimi, baptaý deńgeıi men ańshylyq sheberligi baǵalanady.
Jarys kórermenderge erekshe áser syılap, adam men tabıǵat arasyndaǵy ǵasyrlar boıy qalyptasqan baılanysyn aıqyn kórsetip otyr. Qusbegilik óneri — halqymyzdyń mádenı murasynyń ajyramas bóligi.
Osyndaı jarystar ulttyq qundylyqtardy saqtaýǵa, jas urpaqtyń salt-dástúrge degen qyzyǵýshylyǵyn arttyrýǵa jáne ulttyq sporttyń damýyna serpin beredi.
Aıta ketelik Ertis boıynda qala balalaryn qusbegilikke baýlyp júrgen pedagog týraly jazǵan edik.