ShQO-da qus fabrıkasynan 320 keli et urlandy
ÓSKEMEN. QazAqparat – Shyǵys Qazaqstan oblysynyń Ulan aýdanyndaǵy qus fabrıkasynan toǵyz qap et urlanǵan, dep habarlaıdy QazAqparat.
ShQO Polıtsııa departamenti baspasóz qyzmetiniń málimetinshe, 18 aqpan kúni «102» qyzmetine habarlasqan qus fabrıkasynyń kúzetshisi belgisiz bireýlerdiń 320 keli taýyq etin jymqyryp ketkenin aıtqan. Shyǵyn kólemi 255 myń teńgege baǵalandy.
«Polıtsııa 22 jáne 26 jastaǵy Ulan aýdanynyń eki turǵynyn ustady. Olardan 9 qap et tárkilendi. Kúdiktiler kinásyn moıyndap otyr. Qazirgi ýaqytta QR QK-niń 188-baby, 2-bóliginiń 1-tarmaǵymen sotqa deıingi tergeý amaldary júrgizilip jatyr», - delingen habarlandyrýda.
