ShQO-da kýrorttyq aımaqtarda qoqys tolyp ketpes úshin baqylaý kúsheıtilgen
ÓSKEMEN. QazAqparat – Shyǵys Qazaqstan oblysynda kýrorttyq aımaqtar qoqys alańyna aınalmas úshin ǵaryshtyq monıtorıng júrgizilýde. Bul jaıly QazAqparat tilshisine ShQO Energetıka jáne TÚKSh basqarmasynyń bólim basshysy Samat Súleımenov aıtyp berdi.
«Ótken jyly «Qazaqstan Ǵarysh Sapary» UK AQ jasaǵan ǵaryshtyq monıtorıng nátıjesinde, 828 stıhııalyq qoqys úıindisi anyqtaldy. Osyǵan oraı qoqys úıindilerin joıý kestesi jasalyp, bekitilgen. Qazirgi ýaqytta qala-aýdan ákimdikterimen 529 zańsyz qoqys polıgony (64%) joıyldy. Bul baǵytta óńir jurtshylyǵy erekshe belsendilik tanytýda», - dedi Samat Súleımenov.
Onyń aıtýynsha, zańsyz qoqys polıgondaryn joıý maqsatynda QR Ekologııa, geologııa jáne tabıǵı resýrstar mınıstrligi WhatsApp jelisinde 8775952490 Call-ortalyǵyn qurdy. Kez kelgen azamat osynda ózi kýá bolǵan qoqys polıgondarynyń fotosýretteri men vıdeolaryn jibere alady.
«Kýrorttyq aımaqtardaǵy qoqys máselesi de erekshe baqylaýǵa alynǵan. Ǵaryshtyq monıtorıngtiń derekterine súıensek, 2020 jyly Alakól men Shalqar kóliniń kýrorttyq aımaqtarynda stıhııalyq qoqystar anyqtalǵan joq. Osy rette, 2022 jyly respýblıkalyq bıýdjet esebinen «Jasyl Qazaqstan» ulttyq jobasy aıasynda mezgil-mezgil paıda bolatyn stıhııalyq qoqys oryndaryna beınebaqylaý kameralaryn ornatý máselesi qarastyrylýda», - dedi ShQO Energetıka jáne TÚKSh basqarmasynyń bólim basshysy.
