ShQO-da Quryltaı saılaýynda 490 myńǵa jýyq adam daýys bere alady
ÓSKEMEN. KAZINFORM — Shyǵys Qazaqstan oblysynda Quryltaı saılaýynda 534 saılaý ýchaskesi jumys isteıdi.
Onyń ishinde 501-i — azamattardyń tirkeý orny boıynsha, 33-i — ýaqytsha bolatyn orny boıynsha. Bul týraly Kazinform tilshisiniń saýahatyna jaýap bergen Shyǵys Qazaqstan oblysy aýmaqtyq saılaý komıssııasynyń tóraǵasy Kınýgýl Bıchýınov málim etti.
— Óńirde Quryltaı depýttarynyń saılaýy kezinde 548 saılaý komıssııasy jumys isteıdi, olardyń ishinde 14 — aýmaqtyq, 534 — ýchaskelik. Komıssııalardyń quramynda 3790 adam bar, olardyń ishinde 98-i — aýmaqtyq saılaý komıssııalarynyń músheleri, 3692-i — ýchaskelik saılaý komıssııalarynyń músheleri. Oblys boıynsha saılaýda 486 465 adam daýys bere alady, — dedi ol.
Shyǵys Qazaqstan boıynsha saılaý ýchaskeleri kelesideı ornalasqan: Óskemen qalasy — 131, Rıdder qalasy — 30, Altaı aýdany — 62, Zaısan aýdany — 38, Glýbokoe aýdany — 41, Katonqaraǵaı aýdany — 24, Kúrshim aýdany — 27, Marqakól aýdany — 29, Samar aýdany — 26, Tarbaǵataı aýdany — 33, Ulan aýdany — 40, Úlken Naryn aýdany — 22, Shemonaıha aýdany — 31.
— Shyǵys Qazaqstan oblysynda erekshe qajettilikteri bar 2104 saılaýshy esepte tur. Oblys aýmaǵynda 109 nómiri boıynsha biryńǵaı call-ortalyq jumys isteıdi. Sonymen qatar ár aýdan men qalada call-ortalyqtardyń jumysy uıymdastyrylǵan. Daýys berý kúni 215 saılaý ýchaskesinde azamattardyń tirkeýin tekserý boıynsha onlaın-servıs iske qosylady. 5 ýchaskede — azamattardy tirkeý boıynsha servıs jumys isteıdi, — dedi Kınýgýl Bıchýınov.
Onyń aıtýynsha, oblysta saılaýshylarǵa qolaıly jaǵdaı jasaý maqsatynda saılaý ýchaskelerinde jasyryn daýys berýge arnalǵan kabınalar, statsıonarlyq jáne tasymaldanatyn jáshikter, aqparattyq stendter, qajetti jabdyqtar men navıgatsııa ornatylady.
— Múmkindigi shekteýli adamdar úshin qoljetimdilikti qamtamasyz etýge erekshe nazar aýdarylady. Densaýlyq jaǵdaıy boıynsha ýchaskege kele almaıtyn saılaýshylar úshin Qazaqstan Respýblıkasynyń zańnamasynda belgilengen tártippen olardyń bolatyn jeri boıynsha daýys berý uıymdastyrylady. Daýys berý kúni múmkindigi shekteýli saılaýshylarǵa arnalǵan ınvataksı, sýrdoaýdarmashy qyzmeti uıymdastyrylady, — dedi Shyǵys Qazaqstan oblysy aýmaqtyq saılaý komıssııasynyń tóraǵasy.
Eske salsaq, osyǵan deıin Abaı oblysyndaǵy ýchaskelerdiń Quryltaı saılaýyna daıyndyǵy qalaı ekendigin jazǵanbyz.
