ShQO-da qurylysy «jyr» bolǵan Osınov asýyndaǵy jol qaıta salyna bastady
ÓSKEMEN. KAZINFORM — Shyǵys Qazaqstan oblysy Altaı aýdanyndaǵy qurylysy «jyr» bolǵan Osınov asýyndaǵy jol qaıta salyna bastady.
2018 jyly Óskemen-Altaı baǵytyndaǵy Osınov asýynan tóte joldyń qurylysy bastalǵan bolatyn.
Bul — óte mańyzdy jol. Sebebi Altaı aýdanyndaǵy Buqtyrma sý qoımasyna jáne Katonqaraǵaı aýdanyna týrıster tek osy jol arqyly jetedi.
Joldyń salynyp bitpeý sebebin ákimdik — jol salýshylar baıqaýsyzda orman sharýashylyǵynyń jerine kirip ketken dep túsindirgen.
«QazAvtoJol» UK» AQ málimetine súıensek, qazirgi ýaqytta bul másele sheshilip, qurylys jumystary qaıta bastaldy.
«Buǵan deıin memlekettik orman qory jerlerin kóliktik jer sanatyna aýystyrý rásimderiniń uzaqqa sozylýyna baılanysty Osınov asýynda qurylys jumystaryn júrgizý múmkin bolmady. Búginde barlyq qajetti rásim aıaqtalyp, jerge qatysty memlekettik aktiler alyndy», — delingen aqparatta.
Bıyl burǵylaý-jarý jáne qazý jumystaryn aıaqtaý kózdelip otyr. Sonymen qatar asýdaǵy Pıhtovka ózeni arqyly ótetin kópirge tirekter ornatylmaq.
Jalpy jol qurylysyn 2025 jylǵa deıin aıaqtaý josparlanǵan.
