ShQO-da qurylysy «jyr» bolǵan Osınov asýyndaǵy jol bıyl salynyp bitedi
ÓSKEMEN. KAZINFORM – Shyǵys Qazaqstan oblysy turǵyndarynyń Osınov asýyndaǵy jol qurylysynyń aıaqtalýyn kútip júrgenderine 7 jyldan asty.
2018 jyly Óskemen-Altaı baǵytyndaǵy Osınov asýynan tóte joldyń qurylysy bastalǵan bolatyn. Bul - óte mańyzdy jol. Sebebi Altaı aýdanyndaǵy Buqtyrma sý qoımasyna jáne Katonqaraǵaı aýdanyna týrıster tek osy jol arqyly jetedi.
Arada 7 jyl ótse de jol áli salynyp bitpedi.Onyń sebebi – jol salýshylar baıqaýsyzda orman sharýashylyǵynyń jerine kirip ketken. Áıteýir másele sheshilip, 2023 jyldyń qazan aıynda jumys qaıta jandandy.
«Qazavtojol» Shyǵys Qazaqstan oblystyq fılıalynyń málimetine súıensek, 2025 jyldyń aıaǵyna deıin qurylysty aıaqtaý josparlanǵan.
- Qarjylandyrýǵa qatysty eshqandaı qıyndyq joq. Respýblıkalyq bıýdjetten aqsha bólinip jatyr. 2023-2024 jyldary josparlanǵan 13,2 mlrd teńgeniń 7,9 mlrd teńgesi ıgerildi. 2025 jylǵa taǵy 5,3 mlrd teńge bólinedi, - deıdi fılıal dırektory Nurbek Temirhanov.
Eske salsaq, osyǵan deıin ShQO joldaryn qansha dron patrýldep júrgeni jaıly jazǵanbyz.