ShQO-da qurylys jumystary kezinde traktor aýdarylyp, jumysshy kóz jumdy

ÓSKEMEN. KAZINFORM — Shyǵys Qazaqstan oblysy Ulan aýdanynda jumysshy mert bolýyna baılanysty tergeý bastaldy.

Oqıǵa búgin tańerteń Ulan aýdanyna qarasty Bozanbaı aýylynda bolǵan. Qurylys jumystary kezinde traktor transheıaǵa aýdarylyp, sonyń saldarynan 45 jastaǵy júrgizýshi qaza boldy. Marqumnyń artynda bes balasy qaldy.

Sol jerge Shyǵys Qazaqstan oblysynyń ákimi Nurymbet Saqtaǵanov, memlekettik eńbek ınspektsııasynyń basshysy jáne Ulan aýdanynyń ákimi jedel jetti.

Óńir basshysy sý qubyry jelilerin salyp jatqan «TM Teplomır» JShS-niń qyzmetine qatysty jan-jaqty tergeý júrgizýdi tapsyrdy. Eńbek qaýipsizdigi talaptarynyń buzylýy anyqtalǵan jaǵdaıda kináliler qoldanystaǵy zańnamaǵa sáıkes jaýapqa tartylady

— Mundaı jaǵdaılarǵa beı-jaı qaraýǵa bolmaıdy. Bolǵan oqıǵanyń naqty sebepteri anyqtalýy tıis, — dedi Nurymbet Saqtaǵanov.

Sonymen qatar, oblys ákimi Ulan aýdanynyń ákimine qaza bolǵan azamattyń otbasyna qajetti barlyq kómek pen qoldaý kórsetýdi tapsyrdy.

Eske salsaq, osyǵan deıin Ekibastuzda jumysshy tok soǵyp, mert bolǵany habarlanǵan.