ShQO-da qurylys kompanııalary úıdiń qunyn azaıtyp kórsetip, 420 mln teńge salyq tólemegen
ÓSKEMEN. KAZINFORM – Shyǵys Qazaqstan oblysynda qurylys kompanııalarynyń salyqty az tóleý úshin jasaǵan túrli shemalary áshkere boldy.
ShQO prokýratýrasy kópqabatty turǵyn úıler salýmen aınalysatyn kásipkerlerdiń salyqty tolyq kólemde tóleýine qatysty taldaý júrgizdi. Tekserý barysynda qurylys kompanııalarynyń tabysty qalaı kórsetetini jáne salyq mindettemelerin qanshalyqty adal oryndaıtyny zerdelendi.
- Sonyń nátıjesinde keıbir qurylys kompanııalarynyń salyqtyq mindettemelerdi tómendetýge baǵyttalǵan túrli shemalardy qoldanǵany anyqtaldy. Atap aıtqanda, satylǵan turǵyn úılerdiń, sonyń ishinde kommertsııalyq nysandardyń qunyn tómendetip kórsetken. Sonymen qatar satylǵan páterlerdiń naqty sanyn jasyrý jaǵdaılary da tirkelgen, - dep habarlady prokýratýranyń baspasóz qyzmetinen.
Budan bólek, jekelegen mámilelerdi syıǵa tartý sharttary arqyly rásimdeý derekteri anyqtaldy. Mundaı tásil kompanııalardyń tabysyn jasandy túrde azaıtý maqsatynda qoldanylǵan.
- Taldaý qorytyndysy boıynsha prokýratýra qadaǵalaý aktilerin engizdi. Sonyń negizinde salyq organdary tıisti tekserýler júrgizip jatyr. Qabyldanǵan sharalardyń nátıjesinde memleket kirisine 420 mln teńgeden astam qarajat óndirildi, - delingen aqparatta.
Eske salsaq, osyǵan deıin ShQO-da prokýratýranyń jer telimderin berý rásimindegi zańsyz kedergilerdi joıǵany habarlanǵan.
