ShQO-da qurbandyq shalýǵa arnalǵan 13 oryn belgilendi

ShQO Din isteri basqarmasynyń málimetine súıensek, mereke qarsańynda oblysta qaıyrymdylyq aktsııalary ótkizilip, áleýmettik turǵyda az qamtylǵan azamattarǵa qurbandyq eti men azyq-túlik sebetteri taratylady. Óńir boıynsha qaıyrymdylyq kómegimen 100-ge jýyq otbasy qamtylmaq.

- Óskemen qalasynda negizgi merekelik sharalar Halıfa Altaı meshiti mańynda ótedi. Munda kıiz úıler tigilip, qoǵamdyq saýda oryndary uıymdastyrylady. Sonymen qatar qala jáne aýdan ákimdikteri merekelik is-sharalar baǵdarlamalaryn bekitip, arnaıy 13 qurbandyq shalý ornyn belgiledi, - deıdi basqarma basshysy Erbolat Oshaqbaev.

Atap aıtqanda:

Óskemen qalasynda — Atyǵaı asýy (Almaty–Óskemen tasjoly);

Rıdder qalasynda — D.Qonaev atyndaǵy Rıdder qalalyq meshiti;

Altaı aýdanynda — «Tenar» qojalyǵy;

Glýbokoe aýdanynda — «Tastanbekov J.T.» JK;

Zaısan aýdanynda — «Shyǵys-A» mal soıý pýnkti;

Kúrshim aýdanynda — «Moınaq» sharýa qojalyǵy;

Tarbaǵataı aýdanynda — Aqjar aýyly;

Ulan aýdanynda — Atyǵaı asýy;

Úlken Naryn aýdanynda — Gornyı kóshesi, 8/1;

Shemonaıha aýdanynda — Vokzalnaıa kóshesi, 236;

Katonqaraǵaı aýdanynda — Katonqaraǵaı aýyly, Abaı kóshesi, 82;

Marqakól aýdanynda — Qaljyr aýyly;

Samar aýdanynda — Aqqala aýyly, «Samar-Vet» mal soıý alańy.

- Mereke kúnderi áleýmettik mańyzy bar azyq-túlik pen et ónimderiniń baǵasyn turaqtandyrý máselesine erekshe nazar aýdarylady. Osyǵan baılanysty basqarma kásipkerler men sharýa qojalyqtarynyń basshylaryn baǵany negizsiz kótermeýge shaqyrady. Qurban aıt merekesi aıasynda «Taza Qazaqstan» ekologııalyq aktsııasy da qatar júrgiziledi. Sonyń barysynda merekelik is-sharalar ótetin oryndarda tazalyq pen sanıtarlyq talaptardy saqtaý jumystary kúsheıtiledi, - deıdi E.Oshaqbaev.

Eske salsaq, osyǵan deıin Qaraǵandyda Qurban aıt kezinde qurban shalynatyn arnaıy oryndar belgilengeni habarlanǵan.