ShQO-da Qunanbaı mýzeıiniń qurylysy bastaldy
Bul jaıly aımaq basshysy Danıal Ahmetov óziniń Facebook-tegi paraqshasynda jazdy.
«Jumys saparymen Abaı aýdanynda boldym. Uly aqynnyń týǵan jerindegi «Syrt Qasqabulaq» stellasynyń qurylysymen tanystym. Jumystyń birinshi kezeńi aıaqtaldy. Sondaı-aq Aqshoqyda Qunanbaı áýletiniń qorymy jańartylyp, mýzeı qurylysy bastaldy. Mundaǵy basty mindet - hakimniń ata-anasyna qurmet kórsetý. Mýzeı qazaq halqynyń qundylyqtary men urpaqtar sabaqtastyǵyn saqtaý turǵysynan óte mańyzdy nysan ekenin erekshe atap ótkim keledi», - dedi ákim.
Onyń aıtýynsha, Jıdebaıdaǵy memorıaldyq keshende de aýqymdy jóndeý jumystary júrgizilýde.
«Biz bul keshendi túbegeıli jańartsaq ta, onyń tarıhı, sáýlettik kelbetin saqtaımyz. Abattandyryp, jaryqtandyrý júrgizemiz. Memleket basshysy Qasym-Jomart Toqaevtyń tapsyrmasyna sáıkes, Abaıdyń 175 jyldyǵyn atap ótý bizdiń dástúrimizge degen qurmet kórsetý. Sondyqtan munda halyq aqynnyń shyǵarmashylyǵymen tanysyp qana qoımaı, jaqsy demalyp, ólke, Otan tarıhyn zertteýge múmkindik alady», - dedi Danıal Ahmetov.
Shilde aıynyń sońyna qaraı Qaraýyl aýylyndaǵy 300 oryndyq jańa mekteptiń jáne dala sahnasy ornalasatyn saıabaqtyń qurylysyn aıaqtalmaq.
