ShQO-da kún saıyn 13 myńǵa jýyq adamǵa vaktsına salynýda

ÓSKEMEN. QazAqparat – Shyǵys Qazaqstan oblysynyń ákimi Danıal Ahmetov qala, aýdan basshylarymen shaǵyn jáne orta bıznes ókilderiniń «Ashyq» jobasyna qatysýyna baılanysty jınalys ótkizdi, dep habarlaıdy QazAqparat tilshisi.

Bul jaıly ol Facebook jelisindegi jeke paraqshasynda jazdy .

«Kásipkerlerdiń jumysyn turalatyp almaı, halyqtyń da qaýipsizdigin qaperden shyǵarmaı, qalypty ómirdi qamtamasyz etýdiń jalǵyz joly – «Ashyq» jobasy. Osy sııaqty baǵdarlamalar men qosymshalar álemniń barlyq órkenıetti elderinde qoldanylýda. 20-tamyzǵa deıin qalalar men aýdandardyń ákimderi kásipkerlermen kezdesip, «Ashyq» jobasyna qanshasynyń qatysyp jatqandyǵyn, qalǵandarynyń daıyndyǵy qaı deńgeıde ekendigin, baǵdarlamaǵa qosylýda qandaı da bir kedergiler bar ma, sonyń bárin anyq kórsetýleri tıis», - dedi Danıal Ahmetov.

Onyń aıtýynsha, óńirde halyqty vaktsınatsııalaýdyń qarqyny jaqsy. Búgingi tańda kúnine 13 myńǵa jýyq adamǵa vaktsına salynýda.

«Aldaǵy ýaqytta kúnine 16 myń dozaǵa deıin jetedi degen jospar bar. Biz tek osylaı ǵana koronavırýs ınfektsııasynyń taralýyn tómendetip, jaqyndarymyzdy indetten qutqara alatynymyzdy eskerýimiz kerek», - dedi oblys ákimi.