ShQO-da kún saıyn 100 myń dana medıtsınalyq maska shyǵarylmaq
ÓSKEMEN. QazAqparat – Shyǵys Qazaqstan oblysynda táýligine 100 myń dana qaıta paıdalanýǵa bolatyn medıtsınalyq maskalar shyǵarylmaq, dep habarlaıdy QazAqparat.
Bul jaıly aımaq basshysy Danıal Ahmetov óziniń Facebook jelisindegi paraqshasynda jazdy.
«Búgin Semeı qalasynda birneshe márte qoldanylatyn maskalardy shyǵarý barysymen tanystym. Táýligine 100 myń dana jasaýdy josparlap otyrmyz. Osylaısha, 15 kún ishinde oblysty túgel qamtamasyz etemiz. Kásiporyndar aldynda qysqa merzim ishinde kem degende 6 mıllıon maska jasaý mindeti tur. Shıkizat máselesi sheshildi», - dedi ákim.
Óndiristiń negizgi kólemin Semeı qalasynyń tigin kompanııalary oryndamaq. Atap aıtqanda, «Semeıspetssanb», «ÝK ıÝnıs» mekemeleri. Budan bólek, oblystyń taǵy 10 kásiporynymen kelisimshart jasalynǵan. Búginnen bastap olar táýlik boıy jumys isteýde.
