ShQO-da qumar oıynǵa shaqyratyn blogerler men akkaýntar anyqtaldy
ASTANA. KAZINFORM – Shyǵys Qazaqstan oblysynda Instagram-da zańsyz lotereıa uıymdastyrǵan 12 akkaýnt pen onlaın-kazıno jumysyn nasıhattaǵan blogerler anyqtaldy.
Ekonomıkalyq tergeý departamentiniń málimetterine qaraǵanda, 2025 jyldyń basynan beri áleýmettik jelilerdi monıtorıngileý barysynda zańsyz lotereıa uıymdastyrǵan 15 paraqsha anyqtaldy. Akkaýnt ıeleri QR Ákimishilik quqyq buzý kodeksiniń 445-1 baby boıynsha jaýapqa tartyldy. Salynǵan aıyppuldyń jalpy somasy 5 mln teńge boldy.
Bul rette ásirese onlaın-kazıno jarnamasyna erekshe nazar aýdaryldy. Bıylǵy jyldyń shilde aıynda 2,3 mln 303 myń jazylýshysy bar tanymal eki bloger anyqtaldy. Olar storısterinde qumar oıyndar men promokodtardy jarııalaǵan.
Materıaldar quqyq buzýshylardy jaýapqa tartý úshin ókiletti organdarǵa joldandy.
-Onlaın-keńistik qumar oıyndardy taratatyn negizgi arna bolyp qalyp otyr. Sonyń ishinde kámeletke tolmaǵandar arasynda da. Sol úshin biz turaqty túrde ınternet-kontentin monıtorıngilep otyramyz. Al zańsyz oıyn qyzmetterine qatysty saıt siltemeleri buǵattaý úshin Tsıfrlyq damý mınıstrliginiń «Kıberbaqylaý» júıesine jiberiledi,-dedi ShQO ekonomıkalyq tergeý departamentiniń 2-shi jedel basqarý ortalyǵy bastyǵynyń mindetin atqarýshy Qýat Rahymbaev.
2025 jyly saıttardy buǵattaý boıynsha 637 suranys jiberilip, onyń 591 siltemesi buǵattaldy. Sondaı-aq zańsyz túrde qumar oıyndaryn onlaın taratqan 21 ınternet-resýrs anyqtaldy.
Vedomstvonyń málimetinshe, zańsyz oıyn bıznesin uıymdastyrǵany úshin qylmystyq jaýapkershilik qarastyrylǵan. Budan bólek, óńirde lýdomanııa deńgeıin tómendetý úshin profılaktıkalyq jumys júrgizilip jatyr. Sonaı-aq eńbek ujymdarymen kezdesýler ótip, volonterler men jergilikti atqarýshy organdardyń qatysýymen QR-kodtary bar býkletter men plakattar taratylyp turady.
Osyǵan deıin Óskemende AES mamandaryn daıarlaıtyn jańa bilim berý baǵdarlamasy iske qosylatyny týraly jazdyq.