ShQO-da kúdikti besinshi qabattyń balkonynan sekirip ketti
ÓSKEMEN. QazAqparat – Shyǵys Qazaqstan oblysynda besinshi qabattan sekirgen kúdiktiniń ólimine qatysty tergeý júrgizilýde, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetinshe, 7 qarashada turǵyn úıdiń besinshi qabatynan qulaǵan 42 jastaǵy er adam jedel járdem kóligimen Aıagóz aýdandyq aýrýhanasyna jetkizilgen. Túske qaraı ol esin jımastan medıtsınalyq mekemede kóz jumdy.
«Anyqtalǵandaı, marqum balkonnan sekirgen páter aýdandyq polıtsııa bólimi qyzmetkeriniń ata-anasyna tıesili. Sot-medıtsınalyq saraptama nátıjeleri boıynsha er adamda basqa dene jaraqattary tabylǵan joq», - dedi ShQO PD bastyǵynyń orynbasary Eldos Zakımov.
Sonymen qatar marqum 2-toptaǵy múgedek qyzdy zorlaý faktisi boıynsha kúdikti bolǵan. Qazir oqıǵanyń barlyq mán-jaıyn arnaıy komıssııa tekserip jatyr.
