ShQO-da kóshi-qon zańnamasyn buzǵan 150-ge jýyq adam jaýapqa tartyldy

ÓSKEMEN. QazAqparat – Shyǵys Qazaqstan oblysynyń polıtsııa qyzmetkerleri «Ýchaske» jedel aldyn alý sharasyn júrgizýde, dep habarlaıdy QazAqparat tilshisi.

ShQO Polıtsııa departamenti baspasóz qyzmetiniń málimetinshe, 1 qyrkúıekte bastalǵan shara barysynda tártip saqshylary turǵyn úılerdi, jalǵa alynǵan páterlerdi, saýda núktelerin, sharýa qojalyqtaryn, qystaqtardy, esepte turǵandar men túrmeden shartty túrde bosatylǵandardy tekserýde. Sonyń nátıjesinde, osy ýaqytqa deıin 9000-nan astam ákimshilik quqyq buzýshylyq anyqtalǵan.

«Naqty aıtqanda, tirkeýsiz turyp jatqan – 3348, sheteldikter men azamattyǵy joq adamdardy qabyldap, kóshi-qon zańnamasyn buzǵan – 144 adam jaýapqa tartyldy. 11 myńnan astam páter men 230 myńnan astam jeke turǵyn úı tekserildi. Jalǵa beriletin 362 páter anyqtaldy», - delingen aqparatta.

Sonymen qatar alkogoldi ishimdik ishken jáne qoǵamdyq orynda mas kúıde júrgen 66 kámelettik jasqa tolmaǵan balanyń, túngi ýaqytta kóshe kezgen 49 jasóspirimniń ata-anasy ákimshilik jaýapkershilikke tartyldy.

Aıta keteıik, «Ýchaske» jedel aldyn alý sharasy jeltoqsan aıyna deıin jalǵasady.