ShQO-da kóshede ıtti baltalaǵan adam izdestirilip jatyr
ÓSKEMEN. KAZINFORM – Shyǵys Qazaqstan oblysy Ulan aýdanynda polıtsııa janýarǵa qatygezdik kórsetý faktisi boıynsha tergeý amaldaryn bastady.
Oqıǵa Ulan aýdany Prıvolnoe aýylynda bolǵan. Kýágerlerdiń aıtýynsha, er adam kúshikti mototsıklge baılap, jol boıymen súıregen. Keıin ony aýyl turǵyndarynyń kózinshe baltalap tastaǵan.
ShQO Polıtsııa departamentiniń málimetinshe, qazir tártip saqshylary kúdiktiniń kim ekendigin anyqtap jatyr.
- Atalǵan fakti boıynsha Ulan aýdandyq polıtsııa bólimine shaǵym tústi. Polıtseıler birden tergeý amaldaryn qolǵa aldy. Qazirgi ýaqytta oqıǵanyń barlyq mán-jaıyn anyqtaýǵa baǵyttalǵan tıisti sharalar júrgizilip jatyr, - delingen aqparatta.
Vedomstvo dereginshe, janýarǵa qatygezdik tanytqandar qylmystyq jaýapkershilikke tartylady. QR QK-niń 316-babyna sáıkes, 200 AEK-ke deıin (786 400 teńge) aıyppul salý nemese 50 táýlikke deıin ákimshilik qamaýǵa alý jazasy qarastyrylǵan.
Eske salsaq, osyǵan deıin ShQO-da janýarlardy azaptap, vıdeoǵa túsirgen qyz polıtsııaǵa jetkizilgeni habarlanǵan.