ShQO-da qos azamattyqpen júrgen 11 adam elden shyǵaryldy

ÓSKEMEN. KAZINFORM – Shyǵys Qazaqstan oblysynda qos azamattyqpen júrgen 63 adam anyqtaldy. 

ShQO Polıtsııa departamentiniń málimetine súıensek, tártip saqshylary bir jylda qos azamattyǵy bolǵany úshin 63 adamdy ákimshilik jaýapkershilikke tartty. Olardyń 38-i shetel azamattyǵyn alǵany týraly belgilengen merzimde habarlamaǵany úshin, 15-i Qazaqstan Respýblıkasynyń pasporty men jeke kýáligin zańsyz paıdalanǵany úshin jaýapqa tartyldy.

– Máselen, 47 jastaǵy óskemendik 2025 jyldyń qazan aıynda qyzymen birge basqa memlekettiń azamattyǵyn alǵanymen, bul týraly ýákiletti organdarǵa habarlamaǵan. Er adam sot sheshimimen Qazaqstan Respýblıkasynyń aýmaǵynan shyǵaryldy. Jyl basynan beri sot sheshimimen elden 11 adam shyǵarylǵan. Barlyq quqyq buzýshydan QR azamattarynyń qujattary tárkilendi, - delingen aqparatta. 

Osy rette, kóshi-qon qyzmeti Qazaqstan Respýblıkasynyń Konstıtýtsııasyna sáıkes elde qos azamattyqqa jol berilmeıtinin eske salady. Shetel azamattyǵyn alǵan jaǵdaıda 30 kún ishinde ishki ister organdaryna habarlap, Qazaqstan Respýblıkasynyń qujattaryn tapsyrý qajet.

Eske salsaq, osyǵan deıin BQO-da qos azamattyǵyn jasyrǵan áıelge aıyppul salynǵany habarlanǵan.