ShQO-da kórshisinen ósh almaq bolǵan er adam shatasyp basqa bireýdiń qorasyn órtep jibergen
ÓSKEMEN. KAZINFORM – Shyǵys Qazaqstan oblysy Shemonaıha aýdanynda kórshisinen ósh almaq bolǵan er adam shatasyp basqa adamnyń qorasyn órtep jibergen.
ShQO polıtsııa departamenti baspasóz qyzmetiniń málimetine súıensek, aýyl turǵyny óz úıiniń aýmaǵyndaǵy sharýashylyq qora-jaıynyń órtengeni týraly polıtsııaǵa aryz túsirdi. Atalǵan fakti boıynsha «Ózgeniń múlkin qasaqana órteý» baby boıynsha qylmystyq is qozǵalǵan.
- Tergeý barysynda 27 jastaǵy er adamnyń kórshisimen arazdasyp qalyp, onyń múlkin ádeıi órtemek bolǵany anyqtaldy. Ózimen birge benzın toltyrylǵan plastıkalyq bótelkeni alyp, qoranyń aǵash qabyrǵasyna ot qoıǵan. Alaıda keıin ol renjisken adamynyń emes, onyń kórshisiniń qorasyn órtep jibergenin túsingen, - delingen aqparatta.
Órt saldarynan jábirlenýshige 7 mln teńgeden astam shyǵyn keltirildi. Tilsiz jaýdan 10-nan astam mal, 20 tonna shóp, 5 tonna mal azyǵy jáne sharýashylyq tehnıka janyp ketken.
- Qazirgi ýaqytta qylmystyq is boıynsha tergeý amaldary júrgizilip jatyr. Sonyń nátıjeleri boıynsha protsessýaldyq sheshim qabyldanady, - delingen habarlamada.
Eske salsaq, osyǵan deıin Abaı oblysynda joldardy kútip-ustaý talaptaryn buzǵan 12 laýazymdy tulǵa jaýapqa tartylǵany habarlanǵan.