ShQO-da koronavırýspen aýyrǵandar sany 5,3 esege ósken - Danıal Ahmetov
NUR-SULTAN. QazAqparat - Shyǵys Qazaqstan oblysynda bir táýlik ishinde 135 aýyrǵan jaǵdaı tirkelse, onyń 66-sy sımptomdy, 69-y sımptomsyz. Bul týraly Shyǵys Qazaqstan oblysynyń ákimi Danıal Ahmetov oblystaǵy COVID-19 jaǵdaıy týraly tikeleı efırde ótken brıfıngide aıtty, dep habarlaıdy QazAqparat tilshisi.
«Úsh aı kóleminde el ishinde adamdar az aýyrǵan oblystyń biri boldyq. Biz bul jaǵdaıdyń eń qıyn aǵymyna daıyndyqty bastaǵan edik. Birsypyra qajetti jabdyqtardy satyp aldyq. Naýqastar sany kúrt ósken kezde qajet bolatyn ınfektsııa jáne pravızorlyq tósek oryndardy daıyndadyq. Eń alǵashqy «A» jospary boıynsha ázirlengen algorıtmge sáıkes oblysta birinshi koronavırýs tirkelgen kezde 100 ınfektsııalyq, 411 pravızorlyq, 500 karantın orny ashyldy. Biz epıdemııanyń taralý aýqymyn boljaı otyryp «B», «S» jáne «G» josparyn ázirledik», - deıdi oblys ákimi Danıal Ahmetov.
Onyń aıtýynsha, aýrýhanalardaǵy tósek-oryn tapshylyǵyna jol bermeý maqsatynda algorıtm bekitilgen.
«Mysaly, qazirgi kezde ınfektsııalyq aýrýhanada 1 770 oryn, 1 896 provızorlyq oryn jáne 2 590 karantın orny bar. Búginde oblys boıynsha koronavırýs ınfektsııasyn juqtyrǵan 2 313 jaǵdaı tirkelgen. Onyń 1 242-i - sımptomdy, 1 071-i - sımptomsyz. Aýyrǵandar sany bir aı ishinde 5,3 esege ósken. Bir táýlik ishinde 135 aýyrǵan jaǵdaı tirkelse, onyń 66-sy sımptomdy, 69-y sımptomsyz. Semeı qalasynda aýyrǵandar sany azaıǵanyn, al Óskemende kóbeıip kele jatqanyn baıqap otyrmyz», - deıdi ol.
