ShQO-da koronavırýs juqtyrǵandar azaıyp keledi
ÓSKEMEN. QazAqparat – Shyǵys Qazaqstan oblysynda koronavırýs juqtyrǵandar azaıyp keledi, dep habarlaıdy QazAqparat tilshisi.
Óńirde koronavırýs ınfektsııasy boıynsha epıdemıologııalyq jaǵdaı turaqtanýda. Bul týraly brıfıng barysynda ShQO sanıtarlyq-epıdemıologııalyq baqylaý departamentiniń ókili Qanat Turdıev málimdedi.
«Oblys boıynsha reprodýktıvtik sannyń ortasha kórsetkishi -1%-dy quraıdy, al sońǵy bir apta ishinde aýrýdyń ósý qarqyny – 0,2%. Búginde Shyǵys Qazaqstan COVІD-19 boıynsha epıdemıologııalyq jaǵdaıdy baǵalaý matrıtsasyna sáıkes burynǵydaı «jasyl aımaqta« tur. Pandemııa bastalǵannan beri oblys aýmaǵynda koronavırýs ınfektsııasynyń 19 835 jaǵdaıy tirkelgen», - dedi ol.
Qanat Turdıevtyń aıtýynsha, 2021 jylǵy 1 qańtardan bastap oblys boıynsha 176 monıtorıngtik top 544 reıd júrgizgen. Nátıjesinde karantın talaptaryn buzǵan 69 nysan anyqtaldy. Shekteý sharalaryn saqtamaǵandarǵa 2 mln teńgeden astam aıyppul salynǵan.
«ShQO Bas memlekettik sanıtarııalyq dárigeri mindetin atqarýshynyń 22 qańtardaǵy qaýlysyna sáıkes karantın 7 aqpanǵa deıin uzartyldy. Sondaı-aq 25 qańtardan bastap ShQO men Pavlodar oblysynyń shekarasyna eki sanıtarlyq beket qoıyldy. Buǵan koronavırýs ınfektsııasy órship ketken Pavlodardyń»qyzyl« aımaqqa kirýi sebep boldy. Eger kórshiles Almaty, Qaraǵandy oblystarynda epıdemıologııalyq jaǵdaı nasharlaı bastasa onda Shyǵys Qazaqstannyń syrtqy shekaralaryna qosymsha sanıtarlyq beketter ornatylýy múmkin», - dep tolyqtyrdy ShQO boıynsha sanıtarlyq-epıdemıologııalyq baqylaý departamentiniń ókili.
