ShQO-da koronavırýs ınfektsııasynyń aldyn alý sharalary júrgizilýde
NUR-SULTAN. QazAqparat - ShQO aqparattyq ortalyǵynda koronavırýs ınfektsııasynyń aldyn alý sharalaryn kúsheıtýge baılanysty brıfıng ótti. Oǵan oblys ákiminiń orynbasary Álisher Marhabat qatysyp, osy baǵytta atqarylyp jatqan jumystardyń barysyna toqtalyp, BAQ ókilderiniń suraqtaryna jaýap berdi, dep habarlaıdy QazAqparat.
«Qazirgi tańda Shyǵys Qazaqstan oblysynda koronavırýs ınfektsııasynyń aldyn alý sharalary júrgizilýde. Jalpy, osy baǵytta atqarylyp jatqan jumystar aımaq basshysy Danıal Ahmetovtiń tikeleı baqylaýynda», - dedi Álisher Marhabat.
Brıfıngke densaýlyq saqtaý, bilim, mádenıet, muraǵattar jáne qujattama, sondaı-aq kásipkerlik jáne ındýstrıaldyq-ınnovatsııalyq damý basqarmalary men qoǵamdyq densaýlyq saqtaý departamentiniń basshylary qatysty.
Brıfıng barysynda spıkerler Shyǵys Qazaqstan oblysynda koronavırýstyń aldyn alý úshin qandaı sharalar júrgizilip jatqanyn málim etti. Oblystyq densaýlyq saqtaý basqarmasynyń basshysy Іlııas Muhamedjannyń aıtýynsha, óńirimizde saqtyq sharalaryn kúsheıtý maqsatynda medıtsınalyq qyzmetkerler úsh aýysymda jumys isteıtinin bolady. Sondaı-aq brıfıngte basqarma basshysy oblysta koronavırýs taraldy dep jalǵan aqparat taratqan adamdar zań aldynda jaýapkershilikke tartylatynyn atap ótti.
«Infektsııanyń aldyn alý úshin jeke bastyń gıgıenasyn saqtaý qajet. Eger dene qyzýy kóterilse, aýrýhanaǵa barmaı, jedel járdem shaqyryp nemese 1406 telefon nómirine qońyraý shalý kerek. Sonymen qatar halyq kóp jınalatyn oryndarǵa baratyn bolsańyzdar, maska kııý qajet. Negizi medıtsınalyq maskany naýqastar ǵana kııýi tıis. Al densaýlyǵy jaqsy adamdarǵa maska qajet emes», - dedi Іlııas Muhamedjan.
Oblystaǵy barlyq oqý oryndarynda sanıtarlyq-dezınfektsııalaý jumystary júrgiziledi Oqýshylar 16 naýryzdan bastap merziminen buryn demalysqa shyǵady. Al sabaq 5 sáýirde bastalady. Brıfıngke qatysqan oblystyq bilim basqarmasynyń basshysy Saırangúl Jumadilova osylaı dedi.
«Kolledjder men ýnıversıtetterdiń stýdentteri qashyqtyqtan bilim alatyn bolady», - dedi basqarma basshysy.
Brıfıngke qatysqan oblystyq kásipkerlik jáne ındýstrıaldyq-ınnovatsııalyq damý basqarmasynyń basshysy Erjan Shormanov aldaǵy ýaqytta medıtsınalyq maska tapshylyǵy joıylatynyn atap ótti. Osy maqsatta tıisti jumystar atqarylýda.
«Oblys ákiminiń tapsyrmasyna oraı jergilikti kásiporyndarda dákeden medıtsınalyq maska óndiriletin bolady», - dedi Erjan Shormanov.
Qoǵamdyq sharalardy ótkizýge tyıym salyndy. Al kınoteatrlar jekemenshik ıeliginde bolǵandyqtan, bul másele aldaǵy ýaqytta qarastyrylatyn bolady. Bul týraly brıfıng barysynda oblystyq mádenıet, muraǵattar jáne qujattama basqarmasy basshysynyń mindetin atqarýshy Raýshan Nurmuhanova málim etti.
«Jappaı mádenı jáne sporttyq sharalardy, konferentsııalar men kórmelerdi ótkizýge ýaqytsha tyıym salyndy», - dedi Raýshan Nurmuhanova.
